نيهال فى أوضتها
.....سرحانه فى اللى حصل معاها النهارده وحاسه انها بتحلم....بتبص للتليفون وعايزه
تتصل بشريف حاسه ان عندها كلام كتير عايزه تقوله ...بيرن تليفون نيهال...بتمسك
تليفونها بسرعه....
"الوو"
"ازيك يا اجمل
ما شافت عينى "
نيهال بتحس ان ضربات
قلبها بتزيد
"الوو...نيهال ؟
...انت سامعانى؟"
"ايوه
سامعاك"
"طيب مبترديش
ليه؟"
"ارد أقول
ايه؟"
"قولى اى
حاجه...انا عايز اسمع صوتك"
"كان فيه كلام
كتير عايزه اقوله بس أول ما سمعت صوتك نسيت الدنيا كلها"
"انا حاسس انى
قبل ما اشوفك مكنتش عايش"
"بجد؟"
"نيهال...انا مش
هقدر استنى ....انا نفسى انا وانتى نعيش فى بيت واحد "
"انا قولتلك مش
هقدر أعمل حاجه غير لما اعرف مين اللى قتل أميره "
"طيب على الاقل
نعمل خطوبه؟"
"مش هقدر يا
شريف....على الاقل لما يعدى وقت على موت
أميره "
"خلاص نقرا
فاتحه دلوقتى والخطوبه بعدين"
بعد الحاح شريف نيهال
بتوافق على قراية الفاتحه بس مفيش حد هيعرف غير الاهل بس...
"ليه ؟"
"مش عايزه طنط ناديه
وعمو حسين يعرفوا..."
"اللى انتى
عايزاه....هتيجى تتعرفى على حماتك أمته؟"
بتضحك نيهال ومش
مصدقه ان الموضوع اتطور..
"قريب أن شاء
الله وهعرفك على مامتى"
" أكيد هتبقى
قمر زى بنتها"
"أنا عايزه
أسألك سؤال؟"
"اسألى"
"مين البنت اللى
كانت عندك فى المكتب من كام يوم وكانت بتقولك خلينا نشوفك؟"
"البنت الجميله
اللى كانت قاعده معايا وبنهزر سوا"
"جميله؟! .....لما
هى عجباك كده مخطبطهاش ليه"
بيضحك
شريف..."انا عمرى ما هكون غير ليكى....على العموم دى مها بنت خالتى...هبقى
أعرفك عليها...هتحبيها وهتبقوا صحاب ان شاء الله"
"صحاب ...معتقدش
......انا هنام بقى علشان هصحى بدرى"
"انا مش جايلى
نوم....اتكلمى معايا شويه لحد ما أنام "
"أتكلم اقول
ايه"
"اى حاجه.....المهم
انى اسمع صوتك"
بتتكلم نيهال مع شريف
لحد ما هم الاتنين بيناموا وهم بيتكلموا
****************************
تانى يوم الصبح شريف
فى أوضته بيغنى...عواطف وهى خارجه من المطبخ بتسمع صوت شريف وهو بيغنى ...
"ربنا يبسطك
كمان وكمان يابنى "
شريف بيفتح باب أوضته
وبيحضن عواطف وبيبوسها ...
"صباح الخير يا
أحلى ماما فى الدنيا"
"صباح الخير يا
حبيبى.....خير يا شريف...شايفاك مبسوط النهارده؟"
"فى موضوع كنت
عايز أكلمك فيه "
"تعالا نتكلم
واحنا بنفطر"
"يلا يا شادى
هتتأخر على المدرسه"
"حاضر يا ماما
جاى"
بيقعدوا على السفره
...
"خير يا
شريف"
"انا قررت
اتجوز"
"والنبى...مين
....مها؟"
"يا ماما قولتلك
مها زى أختى....واحده اتعرفت عليها من فتره"
بتسكت عواطف ومش
بترد...شريف مستنى رأيها ..
"هاا يا
ماما...ايه رأيك؟"
"مش
موافقه"
"ليه بس يا
ماما...هو انتى لسه شوفتيها "
"قولت مش موافقه
ومش عايزه اشوفها"
بتقوم عواطف وبتروح
ناحية اوضة شادى...
"يلا انت كمان
هتتأخر على مدرستك"
شريف بيسكت وبيقرر
انه مش هيكلمها فى الموضوع تانى غير لما تهدى...
بيخرج شريف من
العماره وبيركب عربيته..بيمسك تليفونه وبيتصل بـ نيهال...
"الو...ايو يا
حبيبى ...انتى فين؟....رايحه القسم ليه....اها.....نسيت اقولك ان وليد اتحول على
النيابه...اه ..بعد ما يخلص التحقيق كلمينى...مع السلامه"
*****************************
فى النيابه....حسين واحسان واقفين قدام مكتب
وكيل النيابه ...نيهال وعلاء ووليد فى المكتب ....علاء بيعترف ان وليد كان معاه
ليلة الجريمه لحد الساعه 4 الفجر ونيهال بتثبت كلامه عن طريق ورقه من المستفى بتثبت
ان علاء كان موجود فى المستشفى فى الوقت ده....وفيديو من المستشفى تم تصويره عن
طريق الكاميرا على باب المستشفى بتوضح وقت دخول وخروج وليد واصحابه.....وكيل
النيابه بيحكم ببرأة وليد بعد الادله اللى قدمتها نيهال.... نيهال بتشكر وكيل
النيابه ...وبيخرجوا .....
حسين اول ما بيشوف وليد
خارج من المكتب بيجرى عليه ووراه أحسان ...
"وليد..أبنى"
بيحضنه واحسان بتحضنه
هى كمان..العسكرى بياخد وليد وبيمشى...
حسين "هو رايح
فين"
نيهال "فى
اجراءات لازم تخلص قبل الخروج"
حسين "انا مش
عارف اشكرك ازاى يا نيهال يابنتى"
نيهال"دى أقل
حاجه اقدمها لآميره...حمدلله على سلامة وليد يا طنط"
أحسان "الله
سلمك يا نيهال يا حبيبتى....ربنا يرزقك بابن الحلال اللى يسعدك ويفرحك زى ما
فرحتينا كده"
حسين "قوليلى يا
نيهال...اقنعتى صاحبه ازاى انه يشهد"
نيهال "هو فى
الاول رفض وانكر ان وليد كان معاه وقالى انا مشفتوش من شهرين....بعد كده جاتلى
فكره...طلعت ورقه من شنطتى...وقولتله دا تقرير من المستشفى بيثبت انه دخل المستشفى نتيجه
أخذ جرعه زياده من المخدرات ولو وليد اعترف بكل حاجه هيروح فى داهيه....قالى ما
الورقه دى هتحبسنى...قولتله انت ممكن تكلم الدكتور صاحبك يعملك ورقه انك كنت فى
المستشفى لاى سبب تانى وانا اوعدك ان وليد مش هيقول حاجه....فى الاخر اقتنع واخدته
وروحنا المستشفى خلصنا الورقه والدكتور صاحبهم ساعدنى انى احصل على الفيديو المسجل
بدخولهم وخرجوهم من المستشفى...والصبح روحت له بيته وجينا سوا....الحمد لله ان الموضوع
اتحل ووليد طلع برأه"
"الحمد لله
يابنتى...ده جميل هفضل شايلوهولك طول العمر"
"ما تقولش كده
....هو انا مش زى أميره ولا ايه؟"
"ربنا يعلم انا
بعزك قد ايه"
بتستاذن نيهال وبتخرج
بتركب عربيتها وبتمشى وبعد شويه بيخرج وليد مع حسين واحسان وبيركبوا عربيتهم
وبيمشوا
*********************************
فى المستشفى....جاسر
ووجدى واقفين قدام العنايه ومستنين خروج الدكتور....شويه والدكتور بيخرج...
وجدى"طمنا يا
دكتور"
الدكتور"الحمد
لله الحاله عدت مرحلة الخطر....هننقلها اوضه عاديه"
وجدى وجاسر بيشكروا
الدكتور وبيحمدوا ربنا على خروج زينب من العنايه....زينب اتنقلت فى أوضه عاديه....وجدى
وجاسر واقفين جنب السرير والممرضه بتركب لها المحاليل..
جاسر بيكلم زينب ...
"ماما...يا حبيبتى....حمدلله
على السلامه"
زينب بتبص لجاسر
وبترد بصوت واطى...
"الله
يسلمك"
وجدى"حمدلله على
سلامتك يا زينب...كده تقلقينى عليكى"
"الله
يسلمك"
جاسر بيكلم وجدى...
"بابا ..انا
لازم اروح الشغل دلوقتى ضرورى...علشان فيه شغل لازم يتسلم....مش هتأخر ..هسلمه وأجى"
"متشغلش بالك
يابنى....خلص شغلك براحتك...انا هقعد جنب زينب...والحمد لله هى بقت كويسه"
بيخرج جاسر من
المستشفى وبيركب عربيته وبيمشى...
************************************
فى بيت حسين....بيدخل
حسين واحسان ووراهم وليد...ناديه اول ما بتشوف وليد بتجرى عليه وبتحضنه...
"الف حمدلله على
سلامتك يا وليد"
"الله يسلمك يا
ماما "
حسين "تعالى
يابنى استريح"
أحسان "اكيد انت
ميّت من الجوع ....ثوانى ويكون الاكل جاهز"
وليد"مش جعان
والله يا عمتو "
أحسان "هو الاكل
اللى حسين بعتهولك وصلك ولا لا؟"
"وصل...بس انا
ماكنتش قادر أكل وزعته على المساجين اللى كانوا معايا"
ناديه"بالهنا
والشفا ليهم....انا عملالك أكل هتاكل صوابعك وراه"
وليد"انا اسف يا
بابا...انا عايزكوا كلكوا تسامحونى"
ناديه "الحمد
لله انك خرجت بالسلامه ...متفكرش فى حاجه تانيه"
حسين "بص يا
وليد....انا اللى يهمنى انك تعرف انى عمرى ما ظلمتك ولا عمرى هظلمك...بخصوص
الوديعه...انا كتب نصها ليك ونصها لاختك علشان الفلوس كانت 3\4 بتاعتى والربع كان
بتاع ناديه...كان من فلوسها....علشان كده انا كتبلك نص فلوسى ليك وكتب لاختك الربع
والربع التانى كان فلوس ناديه"
وليد بعد الكلام اللى
سمعه...بيمسك ايد حسين وبيبوسها...
"انا اسف يا
بابا....ارجوك سامحنى"
حسين "مسامحك
يابنى"
******************************
نيهال فى مكتب
شريف....
"حبيبى شكله
تعبان النهارده...انتى منمتيش أمبارح ولا ايه؟"
"لا منمتش"
"ليه"
"كان فيه واحد
بيغلس عليا وفضل مسهرنى طول الليل "
بيبتسم شريف....
"قوليلى هو مين
...وانا أحبسه 6 أشهر"
بتضحك نيهال...وبتمسك
تليفونها وبتتصل بجاسر...
"بتتصلى بمين؟"
"اتصلت بجاسر
اكتر من مره وتليفونه مقفول"
"وبتتصلى بيه
ليه؟"
"لازم اعرف منه
هو ليه خبى عليه ان تليفون أميره معاه "
"انا من رأيى
تسيبى جاسر دلوقتى.....لانه مش هيعرف يرد عليكى"
"ليه"
"مامته فى
المستشفى ....وحالته صعبه....وهو والده هناك من أمبارح"
"ربنا يشفيها ويصبرهم"
"فيه موضوع كنت
عايز اتكلم معاكى فيه؟"
"خير"
"أميره مقلتلكيش
انها كان عندها مشاكل فى الشغل؟"
نيهال بتفكر شويه
وبعد كده بترد على شريف...
"لا....معرفش.....ليه ايه اللى حصل"
"بعد التحريات
الى عملناها عرفنا ان أميره كانت السبب فى سجن واحده زميلتها فى البنك"
"انت بتقول ايه
يا شريف...أميره عمرها ما تأذى حد"
"اللى حصل
بالظبط...ان أميره بلغت عن زميلتها دى انها بتاخد رشوه نظير تسيهل القروض للعملا
وزميلتها اتمسكت متلبسه واتسجنت"
"وبعدين"
"وبعدين زميلتها
دى خرجت من السجن من شهرين"
"وكل ده فيه
ايه"
"فيه ان زميلتها
هددتها انها هتنتقم منها ومن عيلتها وهتشرّدهم زى أميره ما شرّدت عيلتها"
******************************
