تانى يوم الصبح ......فى شقة حسين .....وليد وأحسان وحسين على السفره
وناديه خارجه من المطبخ وماسكه فى ايديها النسكافيه بتاع وليد.....باب الشقه بيخبط
...احسان هتقوم تفتح ...ناديه بتقولها خليكى....وبتروح ناديه تفتح..
"دا
منزل وليد حسين"
"ايوه مين حضرتك"
"معانا أمر بالقبض عليه"
بيقع النسكافيه من ايد ناديه...وبخوف
بتنادى "الحقنى يا حسين"
بيقوم حسين بسرعه من على السفره ووراه وليد
واحسان...
"خير فيه ايه؟"
ناديه بتعيط ومش عارفه ترد على حسين
واحد من رجال الشرطه بيرد.....
"معانا أمر بالقبض على وليد حسين "
"ليه ...وليد ابنى عمل ايه ؟"
بيقولها حسين وهو بيبص لوليد..زى ما يكون بيسال وليد....
"منعرفش السبب....دى الاوامر اللى
جاتلنا "
وليد "والله يا بابا ما عملت
حاجه "
اتنين من العساكر بيمسكوا وليد....ووليد
بيمشى معاهم وهو خارج من الشقه بيكلم حسين....
"والله يا بابا انا برىء....متصدقش اى
حاجه يقولوها عنى."
"ماتقلقش يا وليد انا مش هسيبك انا جاى
معاك "
بياخد حسين مفاتيح العربيه وبينزل ورا
وليد....
**************************************
جاسر فى شقته....حاسس بوحده فى الشقه دى أول
ليله يقضيها لوحده فى الشقه وبيفتكر الكلام اللى حصل بينه وبين باباه.وعن محاولاته
انه يخليهم يتراجعوا عن فكرة الجواز.....وبيفتكر أميره واللحظات الحلوه اللى كانت
بينهم وعن احلامهم سوا ...والاحداث الاخيره اللى حصلت بينه وبين أميره وبيفتكر كلام نيهال وشكها فيه....وبيقول
لنفسه...
"انا لازم أخلص موضوع وليد النهارده ....انا غلطت انى سمعت كلام نيهال"
"انا لازم أخلص موضوع وليد النهارده ....انا غلطت انى سمعت كلام نيهال"
جاسر بيجهز نفسه علشان يروح القسم ويقدم
الورقه...
****************************
نيهال قاعده على السفره هى ومامتها ساكتين.....وفاء
بتقول لـ نيهال
"مقولتليش يا نيهال جاسر قالك ايه بعد
ما قولتيله على الكلام اللى وليد قاله"
"انكر وقالى انتى اكيد اتجننتى واعصابك
تعبت فى الفتره الاخيره...انا حاسه ان جاسر مخبى حاجه بس مش عارفه ايه هى"
"انا خايفه عليكى يا نيهال"
"من ايه يا ماما.؟"
"انتى يا بنتى لا بتاكلى ولا بتشربى ولا
بتنامى كويس....حياتك كلها بقت القضيه ومين اللى قتل أميره....انا خايفه اللى
قتلها يحاول يأذيكى"
"ما تخافيش عليا يا حبيبتى"
بيرن تليفون نيهال بتمسك نيهال
التليفون....وفاء بتسألها مين اللى بيتصل
"دى طنط ناديه ....الوو....ازيك يا
طنط...عامله ايه يا حبيبتى....مال صوتك... انتى بتعيطى؟...ايه؟...حصل أمته الكلام
ده؟.....متقلقيش يا طنط انا هروح له ....هعرف ايه اللى حصل واطنمك عليه.....مع
السلامه يا حبيبتى"
"خير يا نيهال....حصل ايه؟"
"وليد اتقبض عليه.....انا لازم اروح له
بسرعه واعرف ايه اللى حصل"
بتقولها نيهال وبتاخد شنطتها ووهى خارجه وفاء
بتقولها...
"ابقى طمنينى يا نيهال"
"حاضر يا ماما "
"استرها يارب"
بتخرج نيهال وبتقفل باب الشقه وراها....
*****************************************
فى القسم ...العساكر ماسكين وليد وداخلين القسم....وحسين
داخل وراهم وباين على وشه الخوف والقلق...بيدخل وليد مكتب شريف وبعد 5 دقايق نيهال
بتوصل القسم....حسين بيشوف نيهال وهى داخله ..نيهال بتقرب من حسين...
"الحقينى يا نيهال يابنتى"
"ايه اللى حصل ياعمى...وليد فين"
"جوه فى المكتب...."
"ما تقلقش يا عمى...انا هدخله ...وهطلع
اطمنك"
بتدخل نيهال المكتب .بتطلب من شريف حضور التحقيق بصفتها
محامية وليد....شريف بيسمحلها بالحضور......نيهال بتسأل شريف ...
"شريف بيه ....ممكن اعرف وليد مقبوض
عليه بتهمة ايه؟"
"بتهمة قتل أميره"
"ممكن اعرف.... على اي أساس أصدرتوا حكم
بالقبض عليه؟"
شريف بيمسك ورقه من قدامه "على اساس
الورقه دى"
بتمسك نيهال الورقه ....بتستغرب ازاى الورقه
دى وصلت لشريف...
"بس الورقه دى مش دليل على انه قتل
أميره "
"مش دليل...بس بالورقه دى هو كده مشتبه
فيه....دا ممكن يكون الدافع للجريمه ...ولا ايه رأيك؟"
نيهال بتسكت ومش عارفه ترد على شريف....
"انا سألت وليد كان فين من الساعه 1 لـ
الساعه 4 ليلة الجريمه قال انه كان سهران مع صحابه.....والبواب شافه وهو طالع
العماره واما سألته قال انه كان بيطمن عليها...وفى الحالتين مفيش دليل على
كلامه"
نيهال بتطلب انها تقعد مع وليد
لوحدهم....بيخرج شريف والكاتب...
نيهال بتطلب من وليد انه يقعد.....
"وليد...انت لازم تهدى وتحكيلى على كل
اللى حصل اليوم ده ...متخبيش عليا حاجه يا وليد حتى لو كانت تافهه من وجهة
نظرك...علشان اقدر اساعدك واخرجك منها"
"هو بابا عرف انا هنا ليه "
"متقلقش انا هفهم عمو حسين على كل
حاجه....بس انت لازم تتكلم يا وليد "
"انا هحكيلك على كل اللى حصل بس لازم
تصدقينى فى كل اللى هقوله"
"احكى يا وليد...انا سمعاك"
****************************
فى بيت حسين ...ناديه قاعده فى الانتريه
واحسان بتحاول تتصل بحسين..
"الووو...ايو يا حسين ...ايه اللى
حصل...ازاى متعرفش ...وليد فين؟....نيهال راحتلكوا...طمنى يا حسين اول ما تعرف حاجه
...ربنا يخرجه بالسلامه ....مع السلامه"
"قالك ايه "
"قالى ان وليد لسه جوه فى المكتب...وانه
معرفش هو اتقبض عليه ليه...انا قلقانه على حسين ...خايفه يحصلوا حاجه.....استرها
معانا يارب"
"نيهال راحت القسم؟"
"اه ...وحضرت التحقيق مع وليد"
"تفتكرى يكونوا قبضوا على وليد
ليه"
"مش عارفه والله...انا مخى بيودى ويجيب
فى حاجات ....ربنا يسترها معاك يا وليد ويخرجك بالسلامه"
***************************************
فى القسم.....وليد ونيهال فى المكتب ووليد
بيحكى لـ نيهال الحقيقه...
"فى يوم كنت راجع من الشغل ...فتحت باب
الشقه ودخلت ...لقيت أميره بتتكلم مع مامتها وصوتها عالى لدرجة انهم محسوش بوصولى
وسمعت أميره بتقول لمامتها ....فلاش باك ....
" انتى ليه يا ماما مقولتليش على
الموضوع ده "
"ابوكى قالى متقوليش لحد وان دى حاجه
عاملها علشان يأمن مستقبلك انتى واخوكى وقال ان مفيش حد هيعرف غير بعد وفاته"
"يا ماما احنا مش عايزين حاجه وكفايه ان
انتى وبابا معانا"
"يابنتى ده حقكوا ... احنا الحمد لله مش
محتاجين فلوس.....وبعدين الفلوس دى فى الاول وفالاخر بتاعتكوا...أنتى مين اللى قالك؟"
"ساره صحبتى...شافت اسمى فى الورق
...لقيتها بتتصل بيا وبتقولى على الموضوع واستغربت جدا انى مش عارفه....مابقتش
عارفه ارد عليها اقولها ايه ...قولتلها اكيد بابا عايز يعملهالنا مفاجأه"
بعد ما سمعت الكلام ده قعدت افكر ايه اللى
بابا عايز يعمله مفاجأاه وفلوس ايه....استنيت أميره تيجى تقولى مجتش ...بعد يومين
روحت البنك وسألت على ساره قالولى أنها واخده اجازه...روحت للمدير وعرفت منه كل
حاجه..ومقولتش لأميره انى عرفت ولا سألت وكنت مستنيها تقولى..."
"وبعدين ايه اللى حصل؟"
"بعدها عرفت ان جاسر مسافر...قولت دى
احسن فرصه اتكلم فيها مع أميره....انا كنت زعلان انهم كلهم عرفوا وخبوا
عليا.....روحت لاميره واتكلمت معاها ...فلاش باك....
"تعالا يا وليد اتفضل"
دخلت وقعدت "تشرب ايه؟"
"لا مش هشرب حاجه انا جاى اكلمك فى
موضوع وهمشى بسرعه"
"خير يا وليد"
"انتى ليه مقولتليش ان بابا حاطت وديعه
باسمنا فى البنك؟"
"انت عرفت؟"
"انا عرف من فتره بس كنت مستنيكى
تقوليلى"
"انا عرفت بالصدفه وعرفت ان بابا مش
عايزنا نعرف حاجه "
"بابا مش عايزنا نعرف حاجه ولا انتى
اللى مش عايزانى اعرف حاجه "
"انا...وانا هعمل كده ليه؟"
"انتى عارفه انى لو عرفت مش هوافق على
الظلم اللى بابا ظلمهولى ده"
"ظلم ايه ؟...انت بتتكلم عن ايه"
"بابا كاتب الوديعه باسمنا احنا الاتنين
ومحدد ان كل واحد فينا ليه نص الوديعه...وده حسب الشرع يبقى ظلم....وانتى علشان
كسبانه من الموضوع خبيتى عليا علشان مابوظش الطبخه اللى طبخطوها انتى ومامتك"
"انت بتقول ايه ...انت اكيد
اتجننت....انا زيى زيك معرفتش حاجه عنها غير بعد بابا ما خلص كل حاجه...وبعدين دى
فلوس بابا يقسمها زى ماهو عايز ...ماما ملهاش علاقه بالموضوع"
"انا مش هسكت وهعرف اجيب حقى كويس "
وقومت بعدها وخرجت من الشقه وهى خرجت ورايا
ونادت عليا بس انا مردتش عليها وسيبتها ومشيت......هو ده اللى حصل والله يومها...انا سايبها
كويسه وكانت بتنادى عليا"
"روحت فين بعدها؟؟"
بيسكت وليد
"وليد لازم تتكلم علشان اقدر
اساعدك...."
"بعد ما خرجت قابلت صحابى واتفقنا اننا
هنقضى الليله فى شقة واحد صاحبنا...روحنا الشقه وشربنا كتير وبعد شويه لقيت واحد
من صحابى بينادى علينا روحنا لقينا صاحبنا مرمى فى الحمام....اخد جرعة مخدرات
زياده....اخدناه ورحنا المستشفى لواحد صاحبنا دكتور...وفضلنا لحد الساعه 4 واحنا
فى المستفى وبعدها واحد من صحابى استنى معاه والباقى روّح.."
"وبعدين؟"
"روّحت وتانى يوم عرفت انهم مش لاقين
أميره وبعد وفاتها انا كنت شاكك فى جاسر
وبعد ما عرفت انه مسافرش كنت عايز اجى ابلغ بس ماكنش معايا دليل لحد ما قالى على
موضوع الورقه واستغل البند اللى مكتوب الى بيقول فى حاله وفاة احد الشخصين الوديعه هتروح للشخص التانى...انا خفت وقولت انه أكيد عايز يلبسنى التهمه ويخرج هو منها....والله
هو ده اللى حصل "
"أكيد جاسر هو اللى سلم الورقه دى
لشريف....وليد صحابك لازم يشهدوا انك كنت معاهم وصحبك اللى أخد جرعه زياده لازم
يشهد انك كنت معاه فى المستشفى"
"تفتكرى انهم هيوافقوا.... مفيش حد
هيرضى يفضح نفسه دا ممكن يتسجنوا "
"قولى على عناوينهم وانا هتصرف معاهم ؟"
وليد بيقولها على عناوين اصحابه ....ونيهال
بتطلب من وليد انه ما يتكلمش ولا يقول اللى حصل بينه وبينه أميره لحد ما تعرف هى
هتعمل ايه وهتتصرف ازاى .....بيرجع شريف لمكتبه وبعد محاولات منه انه يخلى وليد
يتكلم ...بيؤمر بحبس وليد 4 أيام على زمة التحقيق ....بيمضى وليد على أقواله ونيهال بتستأذن وبتخرج.....بتلاقى
حسين واقف ...
"طمنينى يا نيهال ايه اللى حصل؟"
"ما تقلقش ...ان شاء الله وليد
هيخرج براءه"
" هم متهمينه بأيه يابنتى "
وليد بيخرج من مكتب شريف والكلبشات فى
ايده....
"وليد ...متقلقش يابنى "
وليد بعد ما بيشوف حسين بيعيط وبيقوله ...
"سامحنى يا بابا"
العساكر بياخدوا وليد وبيمشى...ونيهال بتطلب
من حسين انه يمشى وهى هتحكيله كل اللى حصل ..
*******************************
فى بيت وجدى....زينب زعلانه عشان جاسر...
"لما انتى زعلانه عشانه ...خليتينا
نسيبه لوحده ليه"
"عشان خايفه عليه ونفسى يرجع جاسر بتاع
زمان"
"جاسر عنده حق يا زينب...مراته ما
بقالهاش شهر ميته ...كان المفروض نصبر عليه شويه"
"انا اللى مزعلنى اكتر ان زعلنا مش
فارق معاه"
"هيعمل ايه ماهو كلمنى وأتحايل عليا
علشان نرجع...وانا رفضت علشان خاطرك"
"كان المفروض يجى ويقول انا هعمل اللى
انتوا شايفينُه ...لو كان فعلنا خايف علينا وعلى زعلنا"
"يمكن قعدته لوحده فى الشقه تخليه يفكر
كويس ويعرف يا خد قرار"
"ربنا يهديه"
************************************
بيفتح حسين باب شقته وبيدخل ووراه نيهال....أحسان وناديه اول ما بيشفوه بيقوموا يقفوا ..
ناديه"طمنى يا حسين"
أحسان"تعالى يا نيهال ..اتفضلى .."
.بتدخل نيهال وبتسلم على ناديه واحسان وبتقعد...
أحسان "حد فيكوا يتكلم ويقولنا ايه اللى حصل.؟"
حسين "وليد اتحبس 4 أيام على زمة التحقيق"
ناديه "ليه؟؟"
أحسان "وانتوا سيبتوه وجيتوا؟"
نيهال "عمو حسين مكنش عايز يجى انا اتحايلت عليه ...وجودنا هناك ملهوش لازمه"
حسين "ادينا وصلنا البيت اهو يا بنتى...قوليلى بقى..هم متهمين وليد بأيه؟"
نيهال بتسكت ...مش عارف تقولهم ازاى ...بتلاقى نفسها مضطره انها تقول...
"وليد متهم .بـ...بـ...قتل أميره"
*******************************
