أدهم داخل مستشفى فى اسكندريه وسحر
وراه....بيقرب من موظفين الاستقبال...
"لو سمحتوا...فى اتنين عملوا حادثه من
حوالى ساعه ونص"
"ايوه حضرتك...اطلع الدور التانى واسأل
هناك"
أدهم وسحر بيمشوا بسرعه ...الاسانسير بيتأخر
...بيطلعوا على السلالم.....أدهم بعد وصوله للدور التانى ...شاف يوسف أخو مالك
وباباها ومامتها....قرب أدهم منهم..
"خير يا دكتور ايه اللى حصل "
"أحنا مانعرفش حاجه...أحنا جالنا اتصال
من المستشفى وانا أول ما عرفت أتصلت بيك علطول"
"هم فين"
"فى العمليات"
"العمليات!...مفيش حد طمنكوا
عليهم"
"أحنا واقفين وكل اللى بيخرجوا بيجروا
ومش بيردوا علينا"
"ان شاء الله هيقوموا بالسلامه"
أدهم حاسس انه مش قادر يقُف على رجله من
الخوف ...بيقعد على اقرب كرسى...بتقعد جنبه سحر...
"اهدى يا حبيبى ...ان شاء الله هيخرجوا
بالسلامه "
"يارب يا سحر"
بيتفتح باب العمليات ...بيخرج الدكتور
...أدهم والدكتور أحمد بيجروا عليه....
"طمنا يا دكتور"
"البقاء لله"
******************************
ساره نايمه على سريرها وجنبها زهره على
يمينها ونورا على شمالها...ونجيه واقفه جنبهم....بيتفتح باب أوضتها وبيدخل سالم
والشر باين على وشه...قرب من ساره وضربها بالقلم....
"فضحتينا يا فاجره....حطيتى شرفنا فى
الطين"
زهره بتعيط...وبتحاول تدافع عن ساره...
زهره"حرام عليك يا سالم بتعمل فى أختك
كده ليه...ايه اللى حصل يا بنى"
نورا "حرام عليك يا خوى......ايه اللى
حصل لكل دِه"
سالم مش بيرد وبيضرب فى ساره ....ساره
مستسلمه للضرب ومفيش صوت بيخرج منها.....مفيش غير شلالات من الدموع بتنزل من عنيها
فى صمت....
"اتكلمى يا فاجره....مين اللى عمل فيكى
كده.....مين اللى حط شرفنا فى الطين "
ساره ماردتش..... زهره ونورا حطوا ايدهم على
قلبهم من الصدمه ....سكوت ساره استفز سالم بيزيد من ضربه فيها.....بيمسكها من
شعرها وبيشدها على الارض ..بيخرج من الاوضه وهو بيسحبها من شعرها....ومش فارق معاه
زهره ونورا وهم بيترجوه انه يرحمها...ناصر بيشوفه وهو خارج ومجرجر ساره من شعرها....ساره
بتبصله والدموع ماليه عنيها....بيبصلها بانكسار....
"ليه عملتى فينا وف نفسك كده يا
ساره"
سالم بيشد ساره وماشى...ناصر بيمسك ايده....
"انتى موديها فين؟"
بيطلع صوت سلطان بعد صمته وصدمته....
"سيبه يا ناصر"
بيكمل سالم طريقه
وهو ساحب ساره من شعرها وبينزل بيها درجات السلم.....الالم اللى حست بيه ساره من
الضرب ونزولها على درجات السلم اقل بكتير من الالم النفسى اللى جواها...بيخرج بيها
سالم من الباب الورانى وبيوصل عند أوضه تبع السرايه وبيدخل فيها... بيرمى ساره فيها
وبيمسك خشبه كانت على الارض وبيضرب ساره....
"قولى يا فاجره يا قليلة الحيا ...مين
اللى عمل كده....انا لازم اقتله واقتلك"
زهره ونورا بيترجوا سلطان انه يرحمها....
"علشان خاطرى يا حاج...دى بنتك....دى
تعبانه ....حرام عليكم دى هتموت فى ايديكوا....ابوس أيدك ارحمها"
زهره بتمسك ايد سلطان وبتبوسها.....سلطان
بيسحب أيده و بيمشى ومش بيروُد على زهره....بتجرى زهره على ناصر...
"ساعد أختك يا بنى....انت الوحيد اللى
تقدر تساعدها....ساره لو حصلها حاجه انا ممكن اموت وراها"
ناصر بعد سماع كلام والدته بيحضنها وبتنزل
الدموع من عينه...
********************************
أدهم الدموع بتنزل من عينه بعد سماع كلمة
الدكتور....أحمد بيحاول يتماسك...
"مين اللى مات يا دكتور"
"البنت ماتت البقاء لله"
الدموع بتنزل من عين أحمد وصراخ مامتها بيملى
المستشفى ويوسف بياخد مامته فى حضنه والدموع نازله من عينه...أدهم بيسأل
الدكتور...
"والشاب اللى كان معاها يا دكتور؟"
"كويس هو عنده كسر فى دراعه وجروح
وكدمات سطحيه الحمد لله"
بعد كلام الدكتور بيخرج سريرين من العمليات
السرير الاول عليه أياد متخدر ومش حاسس بحاجه والسرير التانى عليه ملك ووشها
متغطى....أحمد ووالدة ملك بيجروا على ملك وبيحضنوها وبيعيطوا....وأدهم وسحر
بيقربوا من أياد وبيمشوا جنبه لحد وصوله للأوضه اللى هيتحجز فيها....
أدهم بيحسس على شعر أياد وبيقوله.....
"انا السبب...انا السبب فى كل اللى
حصل...سامحنى يا حبيبى"
بتقرب سحر من أدهم وبتطبطب عليه...
"وانتى ذنبك ايه فى الللى حصل....دا
قضاء ربنا"
بيرد أدهم وهو بيعيط....
"انا السبب انا اللى قولتله خُد
عربيتى...أنا السبب "
******************************
سلطان بيدخل الاوضه اللى ساره فيها...أول ما
دخل بص على ساره وهى قاعد فى أحدى زوايا الاوضه والدم نازل مش شفايفها والدموع
نازله من عنيها وسالم بيضرب فيها وهى مستسلمه....حس بوخزه فى قلبه من منظر
ساره....
بس بيفتكر اللى عملته والفضيحه اللى
سببتهالهم...بينادى على سالم...سالم بيرمى الخشبه اللى كانت فى ايديه...
"ما قالتش من اللى عمل فيها كده"
"لا يابوى ...مش عايزه تنطق"
"لازم نعرف من اللى عمل فيها
كده....لازم ننتقموا لشرفنا يا ولدى.....والا الفضيحه والعار هيفضلوا ملازمنا طول
العُمر"
"ماتقلقش يا بوى.....انا هخليك تنطق وتقول كل
حاجه "
بيمسك سالم الخشبه وبيكمل ضرب فى ساره...
"أنطقى ....مين اللى عمل فيكى
كده.....بتدارى عليه ليه....خايفه عليه.....وليه هو مخافش عليك قبل ما يعمل فيكى
اللى عمله "
سلطان بيشوف الضرب ومنظر ساره والدم بيخرج من
كل حته منها...بيخرج من الاوضه بسرعه.....بعد خروج سلطان ساره بيغمى عليها
.....بيمسك سالم جردل فيه مياه وبيرميه عليه....بتفوق ساره ....من تعبها مش قادر
تفتح عنيها.....
"الدلع اللى بتدلعيه دِه ...ميخلش
عليا.....مش هسيبك غير لما تقوليلى على كل حاجه....وبعد كل ده ...هدفنك
حيه....يا فاجره"
*************************************
تانى يوم الصبح ....أدهم فى المستشفى بيكلم
رجاء...
"أياد كويس يا ماما...متقلقيش....هو
نايم دلوقتى أول ما يصحى هخليه
يكلمك...أطمنى والله هو كويس....هنرجع النهارده ان شاء الله....محمد رسول
الله....مع السلامه"
بيدخل أدهم الاوضه بيبص على سحر بيلاقيها
نايمه وهى قاعده على الكرسى....بيقعد جنب أياد على السرير...وبيبصله
وبيدعيله...بيحس بايد سحر بتطبطب عليه....
"ان شاء الله هيبقى كويس "
"يارب يا سحر.....متعرفيش أياد ده
بالنسبه لى ايه....دا ابنى مش أخويا....ممكن يكون الفرق بينا 5 سنين بس اياد ده من
ييوم وفاة بابا الله يرحمه وانا بقيت مسئول عنه هو وأروى ...أنا مقدرش أعيش من
غيرهم"
"ربنا يخليكوا لبعض يا حبيبى....أدعيله
يا أدهم"
"معلش يا سحر ....خليتك تباتى برا
البيت....مش عارف هقول ايه لعمى"
"متقلقش انا كلمت بابا وحكيت له على كل
حاجه.....وبعدين انا مراتك...انت ناسى اننا كاتبين كتابنا "
"ربنا يخليكى ليا "
قبل أدهم ما يكمل كلامه....بيسمع صوت أياد
وهو بيتكلم تحت تأثير البنج...
"خلى ....بالك... يا ملك"
بيقرب أدهم منه....
"أياد...انت كويس"
أياد مش بيرد...بيطلع أدهم ينادى على الدكتور
عشان يطمنه على أياد..أياد بيفوق وبيحاول يقوم من على السرير ....وهو بيقوم بيقع
على الارض ...سحر بتنادى على أدهم ...
"الحقنى يا أدهم"
سحر بتحاول تسند أياد ....أدهم بيدخل بيشوف
أياد بيجرى عليه وبيشله وبينيمه على السرير...
"قومت ليه يا أياد؟"
"عايز اشوف ملك....هى فين "
سحر بتبص لـ أدهم....ادهم بيضطر يكدب على
أياد...
"ملك كويسه...أستريح أنت بس"
"ماتكذبش عليا....انا عارف ان ملك مش
كويسه...انا لازم أطمن عليها"
أياد بيحاول يقوم من مكانه ...أدهم بيحاول
يمنعه....
"سيبونى...انا عايز اشوف ملك....يا
ملـــــــــــــــــــــك"
بيدخل الدكتور على صوت أياد ومعاه حقنه
مهدئه.....أياد بينام بعد ما أخد الحقنه....أدهم بيخرج مع الدكتور...
"نقدر نخرج أمته يا دكتور"
"مش قبل يومين تلاته"
"لو حالته تسمح...أنا كنت عايز انقله اى
مستشفى فى القاهره"
"مفيش مشكله انا هجهزلك تقرير بحالته
وهجزلك عربية الاسعاف اللى هتنقلكوا"
بيشكر أدهم الدكتور وبيرجع الاوضه عند أياد
**************************
ساره من تعبها من اللى حصلها أمبارح نامت على
الارض...بعد شويه بتحس بأيد بتطبطب عليها...بتفتح عنيها بسرعه وهى مخضوضه....
"ما تخافيش يا بنتى....ليه عملتى فينا
وف نفسك كده يا ساره"
ساره بتعيط وبتبص فى الارض ويتقول بصوت متقطع
...
"سا مح ينى يا ماما"
"مين اللى عمل فيكى يا ساره...قوليلى يا
بنتى وريحنى"
ساره ساكته ومش بتتكلم....بتفتكر كل اللى
حصلها ...من الشخص الى بتحبه ووثقتت فيه واللى حصلها من اهلها....بيزيد
عياطها....بتاخدها زهره فى حضنها...
"بس يا ضنايا"
بعد فتره بتهدى ساره ...
"خدى يا حبيبتى...كلى لقمه قبل ما حد
يشوفنا"
بتحاول تأكلها.... بيدخل
سالم فى نفس اللحظه وبيقرب من زهره وبيرمى الاكل بعيد....
"انا قولت انها مش هتأكل ولا تشرب غير
لما تقول مين اللى عمل فيها كده"
"حرام عليك يابنى...دى لو مش هتموت من
ضربك هتموت من الجوع....دى يا أختك يا سالم....انت جبت القسوه اللى فى قلبك دى منين"
"من عمايل بنتك السوده...اللى فضحتنا
ومرمغت شرفنا فى الوحل.....اللى كانت دايره على حل شعرها فى اسكندريه"
زهره بتضرب سالم بالقلم بعد كلامه....
"أخرس...لما انت تقول على اختك
كده...الغريب يقول ايه.....بنتى عمرها ما تعمل كده......ردى يابنتى عليهم وقوللهم من
اللى عمل فيكى كده...مين اللى ضحك عليكى "
ساره ساكته ومابتردش....بيقرب منها سالم
وبيمسكها من شعرها.....
"انتى عارفه لو منطقتيش هو لع فيكى "
بيطلع ولاعه من جيبه وبيقرب الولاعه من شعر ساره وبيولع فى شعرها...
"شايفه شعرك وهو بيولع"
زهره بتبعد سالم عن ساره ...قبل ما يولع فيها...وبتاخدها
فى حضنها....
"أنا هسيبك لحد المغرب .....هجيلك يا
أما تقوليلى على الكلب اللى عمل كده....يا أما هقتلك"
بيخرج سالم من الاوضه ...وزهره لسه واخده
ساره فى حضنها وهم الاتنين بيعيطوا..
*****************************
أدهم وسحر خارجين من المستشفى....الممرضين
بيشلوا أياد وبيحطوه فى عربية الاسعاف....أدهم وسحر بيركبوا العربيه وبيمشوا ورا
عربية الاسعاف....
"مش كنت قولت لمامتك يا أدهم"
"انا عارف ماما ...مش هتصدق انه
كويس وهاتفتكر انى بكذب عليها...احنا أول ما نوصل المستشفى ونطمن عليه...هوصلك البيت
واروح البيت أجيب ماما وأقولها على كل حاجه"
"يا ترى اهل ملك عاملين ايه
دلوقتى...ربنا يصبرهم"
"انا مش عارف هقول لـ أياد ازاى على
اللى حصل."
"لازم تقوله يا أدهم.....هو لازم
هيعرف....خليها تيجى منك ويعرف كل حاجه"
"انا خايف عليه أوووى....مش عارف
هيقدر يستحمل اللى حصله ده ازاى"
"أدهم قوى وان شاء الله هيقدر يساعد نفسه انه يرجع احسن من الاول....بكرا تشوف"
"يارب يا سحر ...يارب"
********************************
بعد المغرب سالم بيدخل الاوضه عند ساره...
"مش هتقولى من اللى عمل كده...أنا عايز
اعرف انتى بتدافعى عنه ليه...للدرجادى بتحبيه....بعد كل اللى عمله فيكى لسه
بتحبيه....ولا اللى عمله ده كان برضاكى"
بتعيط ساره بعد كلام سالم....
"انتى اللى زيك ما تستاهلش انها
تعيش.."
بيقرب سالم منها وبيربط ايدها الاتنين بحبل
طويل ولسه خارج بيها من الاوضه....بيقابله ناصر....
"انت رايح بيها فين يا سالم"
"ملكش صالح يا ناصر"
"ازاى مليش صالح...بقولك واخد ساره ورايح بيها
فين"
"اسأل ابوك الحاج...وهو هيقولك على كل
حاجه...وسع من طريقى"
بيجرى ناصر على السرايه وبيدخل
لابوه....بيشوف الحزن على وشك ابوه...
"فيه ايه يا ناصر"
"سالم هياخد ساره وهايوديها فين
يابوى"
"لازم ندارى عارنا بأيدينا ياولدى"
"يعنى ايه يا بوى....هتقتل بتك"
"الشرف والعرض اهم من اى حاجه يا
ولدى"
"ابوس ايدك يا بوى....متعملش حاجه هتندم
عليها طول عمرك"
"بعد اللى حصل مفيش حاجه هندم عليها قد
انى معرفتش اربى بتى"
بيفقد ناصر الامل سلطان بيخرج من السرايه...وهو بيدور على سالم
وساره...مش بيلاقى حد منهم.....بتيجى نورا وهى بتنهج من الجرى....
"الحقنى ياخوى....سالم واخد ساره
وهيقتلها فى الصحرا."
"هو فين؟"
"ربط ساره فى العربيه وبيسحبها لحد ما
يوصل لقلب الصحرا وهيتويها هناك"....بيركب ناصر عربيته وبيخرج ورا سالم....
****************************
أدهم راجع البيت....رجاء اول ما سمعت صوت
الباب بيتفتح بتخرج بسرعه تشوف مين.....بتشوف أدهم راجع لوحده...
"أياد فين يا أدهم"
أدهم ساكت ومش عارف يقولها الموضوع ازاى....
"رد عليا بقولك اخوك فين"
"أهدى يا ماما وانا هحكيلك على كل
حاجه"
رجاء داخله المستشفى والقلق واضح على
وشها....
"أهدى يا ماما...والله أياد كويس"
"أنا مش ههدى غير لما اشوفه بعنيا"
بيوصلوا الاوضه بتدخل رجاء ووراها
ادهم...رجاء اول ما شافت أياد ودراعه المكسور والجروح اللى فى وشه....
بتعيط وبتقرب منه بتبوسه.....
"بتعيطى ليه يا ماما دلوقتى"
"بعيط على اللى حصل لاخوك"
"ماهو كويس قدامك اهو"
"كل ده وكويس...دا مفيهوش حته
سليمه"
رجاء ماسكه ايد أياد وبتعيط....وأدهم واقف
جنبها....
*********************************
سالم بيوصل لمكان ضلمه فى الصحرا وبيفك ساره
من العربيه....وبيحفر قبرها قدامها.....
"كا ن نفسى القبر ده يكون اتنين....بس
اتني اللى بتضحى بنفسك علشان خاطر كلب ما يستاهلش"
ساره بتبص لسالم وهو بيحفر قبرها ....بتحاول
تتكلم بس مش قادره....بعد محاولات منها لاخراج الكلام...
"أنا.....أنا هقولك على كل حاجه"
*******************************
