فى مكان الحادثه....عربيات الاسعاف والشرطه واقفين وفريق من البحث الجنائى
بيقوم بشغله وبيعاينوا المكان...بيوصل شريف لمكان الحادث
بيسأل شريف احد العساكر" مين اللى لقى الجثه"
"حارس العماره يا فندم "
"هو فين؟"
بيجى حارس العماره وملامح الخوف
ظاهره على وشه
شريف"انت اللى لقيت الجثه؟"
الحارس "ايوه يا باشا"
شريف "قولى انت لقيتها ازاى ؟"
الحارس "والله يا باشا انا لسه راجع من البلد...الجماعه بتوعنا كانوا
تعبانين شويه فـ روحت اطمن عليهم...صاحب العماره
اتصل بيا علشان يبلغنى ان الناس اللى هتهد العماره هيبتدوا من النهارده ...فرجعت
علشان اجهزلهم العدد اللى هيشتغلوا بيها....واول ما وصلت سمعت صوت كلاب فى
العماره...طلعت لقيت الكلاب ملمومه على الجثه ...بعدت الكلاب عن الجثه
واتصلت بحضراتكم على طول"
شريف "بقالك قد ايه فى البلد؟؟"
الحارس"انا سافرت يوم الخميس يا باشا ورجعت النهارده الصبح"
شريف "والعماره فاضيه بقالها قد ايه "
الحارس" من6 شهور يا باشا "
بينادى شريف على احد العساكر ...بيجى العسكرى
شريف "خد اقواله وخليه يمضى عليها ....واتصل باصحاب البلاغ المتقدم
أمبارح"
العسكرى " حاضر يا فندم "
بيروح شريف لمكان الجثه وبيتكلم مع واحد من افراد البحث الجنائى "
شريف "وصلتوا لحاجه؟؟"
رجل البحث الجنائى "الوفاه حصلت من الساعه 1.5 لـ الساعه 3 والمجنى
عليها فى العشرينات ....ومن الواضح ان الجريمه محصلتش هنا لانه مفيش اى أداه
للجريمه ولا دليل على المقاومه...اتقتلت فى مكان واللى قتلها رماها هنا....معرفناش نحدد طريقة القتل لان الجثه اتشوهت بسبب الكلاب....هننقل
الجثه للمشرحه وهنكمل بحث هناك "
شريف "التقرير هيكون جاهز امته ؟"
رجل البحث الجنائى "بكره الصبح ان شاء الله هيكون على مكتب
حضرتك"
**************************************
فى شقة جاسر ....جاسر وحسين كل واحد منهم نايم على كرسى فى الانتريه بعد
سهرهم طول الليل...بيرن تليفون جاسر ..جاسر وحسين بيصحوا ....وبسرعه بيمسك جاسر تليفونه....حسين
بيسأله
"مين يا جاسر "
"دى نيهال......ألووو...ايوه يا نيهال....لامفيش اخبار.....قالولنا لو
فى جديد هيبلغونا.....معلش ماسمعتش التليفون ...معلش يا نيهال فى ويتنج من رقم
غريب هرد عليه وابقى اكلمك تانى ...مع السلامه"
بيقفل جاسر مع نيهال وبيرد على الرقم الغريب
"الووو... ايوه انا....خير...لقيتوا أميره.....حاضر هاجى بسرعه"
حسين بيقعد بانتباه لمكالمة جاسر
"ايه يا جاسر ...فى اخبار عن أميره؟"
"بيقولوا لازم نروح القسم ضرورى....انا هكلم نيهال اقولها تقابلنا
هناك"
"وانا هتصل بحماتك اطمئن عليها....تلاقيها مابطلتش عياط من امبارح"
************************************
فى بيت حسين....ناديه ماسكه التليفون وبتحاول تتصل بجاسر ...لكن مفيش حد
بيرد.....جرس الباب بيرن....بتقوم ناديه بسرعه تفتح الباب
بتلاقى احسان "سلاموا عليكوا....ازيك يا أم أميره"
"ازيك يا أحسان...... تعالى اتفضلى"
"خير ...ايه اللى حصل لآميره"
"مش عارفه والله يا أحسان انا عقلى هيُقف من كترالتفكير....انتى عرفتى
منين"
"كنت بكلم وليد أمبارح ...وقالى على اللى حصل...ان شاء الله خير
متقلقيش"
"مقلقش ازاى يا احسان ...دى بقالها يومين برا بيتها ومش عارفين عنها
حاجه "
"مكلمتيش حسين ولا جاسر؟"
"حسين اخوكى كلمنى من شويه وقالى انهم رايحين القسم ...بيقول فى اخبار
جديده...ومن ساعتها مكلمنيش ولا اعرف حاجه"
"انا اتصلت بيه اكتر من مره بس مفيش حد بيرد.......علشان كده جيت أطمن
واعرف ايه اللى حصل بالظبط"
"ربنا يستر انا قلقانه.....وقلبى مقبوض ....حسه ان أميره حصلها
حاجه"
"تفى من بقك يا أختى.....ان شاء الله هترجع لبيتها ولجوزها....بس انت
ادعيلها "
"يااارب.....يااارب طمنى على بنتى يارب.....هو وليد فين ازاى ميكونش
جنب ابوه وجوز أخته فى موقف زى ده"
"انا كلمته من شويه وقالى انه رايح لهم على القسم"
************************************
فى مكتب المقدم شريف ...حسين وجاسر قاعدين مع شريف
جاسر"خير يافندم....فى اخبار عن مراتى؟"
شريف"احنا لقينا جثه فى عماره مهجوره ..بس مش متأكدين لو هى جثه مراتك
ولا لا"
حسين "انت بتقول..بنتى انا"
جاسر بقلق" اهدى يا عمى ان شاء الله مش هتكون أميره"
شريف "ممكن حضراتكوا تهدوا شويه ...احنا مش عارفين اذا كانت هى بنتك
ولا لا ...حضراتكوا هتروحوا معايا المستشفى دلوقتى تتعرفوا على الجثه "
وهم خارجين من مكتب شريف ...نيهال بتيجى وهى بتجرى
نيهال"خير ياعمى ..ايه اللى حصل ؟"
جاسر "بيقولوا لقوا جثه فى عماره مهجوره ولازم نروح نتعرف عليها
"
نيهال وهى الدموع فـ عنيها
نيهال "مستحيل تكون اميره"
وحسين مصدوم من الخبر اللى سمعه ومش قادر يقول حاجه غير انه عمال يدعى
جاسر "اهدى شويه يا نيهال ان شاء الله مش هتكون اميره"
نيهال "يا رب ياجاسر"
***************************
بيخرجوا من القسم شريف بيركب عربيه البوليس ووراه جاسر بالعربيه ومعاه حسين
ونيهال فى عربيتها
بعد ربع ساعه بيوصلوا للمشرحه
وبيدخل شريف ووراه جاسر وحسين ونيهال وماشيين ببطىء وحسين لسه بيدعى ونيهال
بدأ يبان فى عينها الدموع وبيوصلوا لـ مكان الجثه........
شريف"ممكن يا دكتور تخرج لنا الجثه علشان يتعرفوا عليها "
بيخّرج الدكتور الجثه.....شريف بيبص لجاسر ....جاسر مش عارف يحدد هى ولا مش
هى الجثه مشوه جدا....وحسين مش عارف يحدد وبيبص لجاسر ونيهال واقفه بعيد عن الجثه
مش قادره تبص....
*********************************