الحلقه الاولى
**************
أميره وهى داخله اوضة النوم "جاسر...اصحى يا حبيبى يلا هتتأخر على
شغلك"
"حاضر....سيبينى بس 5 دقايق كمان...تكونى انتى حضرتى الفطار"
"الفطاره جاهز.....قوم بقى يا جاسر هتتاخر على شغلك وانا كمان هتاخر
على البنك...ولا مش ناوى توصلنى فى طريقك"
بيقوم جاسر يدخل الحمام ويغسل وشه ويرجع يقعد على السفره....اميره بتجيب
اخر حاجه من المطبخ وتقعد جنبه على السفره
"انت مش بتاكل ليه...هو الفطار مش عاجبك ولا ايه؟"
"تسلم ايدك ....بس مليش نفس"
"مالك يا جاسر؟؟...بقالك كام يوم مضايق ومش بتتكلم معايا زى
الاول...انا زعلتك فـ حاجه وانا مش واخده بالى"
"لا مفيش حاجه....بس فى لخبطه فى الشغل اليومين دوول علشان كده تلقينى
مضايق شويه"
"روق ياحبيبى....كل حاجه هتتحل ان شاء الله"
"ان شاء الله....انا هقوم اغير هدومى تكونى انتى فطرتى وننزل سوا"
"بس انت مكلتش حاجه ....هتنزل من غير فطار؟؟"
"مليش نفس"
بيقوم جاسر يغير هدومه و أميره قاعده على السفره بتفكر تكون عملت حاجه زعلت
جاسر بس مفيش حاجه حصلت بينهم
أميره فى المطبخ بعد ما رفعت اطباق الفطار عن السفره ..جاسر خرج من اوضة النوم
ورايح ناحية باب الشقه وبينادى على اميره
"أميـــره...انا هسبقك على تحت ..متتأخريش"
"حاضر ياحبيبى مش هتاخر"
فى العربيه جاسر وأميره ساكتين..اميره عايزه جاسر يتكلم
"مقولتليش يا حبيبى تحب تتغدا ايه علشان اقول لماما تجهزهولى وانا
مروحه اعدى عليها اخده"
"اى حاجه"
اميره حست ان جاسر مش عايز يتكلم فسكتت
تليفون أميره بيرن بتفتح الشنطه وطلعت تليفونها "الو...ازيك يا نيهال...الحمد
لله.....انتى ايه اللى مصحيكى بدرى كده ....عندك جلسه بدرى كده ...اه انا فى
الطريق...خير فى حاجه...اوكى....باااى"
"دى نيهال بتقولى هتعدى عليا بعد الشغل وهنروح سوا علشان عايزانى فى
حاجه مهمه "
جاسر مردش على أميره...اميرة اتنرفزت من تجاهل جاسر ليها ..فسكتت وبصت
ناحية الشباك
**************************************
حسين وناديه على السفره
حسين "هو وليد لسه نايم.؟؟"
ناديه"لا...صحى من شويه ودخل الحمام"
بيخرج وليد من اوضته "صباح الخير يا بابا ....صباح الخير يا طنط"
"صباح الخير "
وكالعاده بتتغير تعبيرات وش ناديه بسبب كلمه طنط
"صباح الخير ...ثوانى اعملك النسكافيه بتاعك"
بتقوم ناديه تتدخل المطبخ ووليد بيقعد على السفره
"انت مش هتبطل كلمة طنط دى"
"امال عايزنى اقولها ايه؟"
"قولها ياماما...دى هى اللى مربياك"
"هى اشتكتلك"
"لا مشتكتش"
"انا اسف يا بابا ...بس انا مش هقدر اقول كلمة ماما دى الا لأمى بس
الله يرحمها"
"الله يرحمها ...بس الام اللى بتربى يا بنى"
"معلش يا بابا...مش هقدر"
بتيجى ناديه من المطبخ وفى ايدها كوبايه النسكافيه ....بتحطها قدام وليد
"شكرا"
"بالهنا والشفا يابنى"
بيشرب وليد النسكافيه ويخرج
"متزعليش من وليد يا ناديه ...انت عارفه هو قد ايه كان متعلق
بمامته"
"انا ازعل من وليد ...ده ابنى ...فى حد يزعل من ابنه...انا زعلانه من نفسى
انى مقدرتش اعوضه عن امه...مع انى والله مش بفرق بينه وبين أميره وربنا يعلم"
جرس التليفون بيرن بتقوم ناديه ترد"ازيك يا أميره عامله ايه ....باباكى
بيسلم عليكى....حاضر هجهزه...لا متقلقيش ...مع السلامه"
حسين بيبص لناديه "عايزه ايه أميره"
"بتوصينى اجهزلها الاكل علشان تاخده وهى مروحه من الشغل"
"طيب مش عايزه حاجه اجيبهالك معايا وانا جاى"
"لا مش محتاجين حاجه .....انت رايح فين على الصبح كده"
"هروح البنك اخلص الاوراق اللى كانوا طلبينها منى....بقالهم فتره
طالبين الورق...وانا اللى مرحتش اقدمه"
"مش كنت عملت الموضوع ده فى البنك اللى اميره شغاله فيه ...وكنت
استريحت من وجع الدماغ ده واميره كانت هتخلص كل الاوراق المطلوبه"
"انا مش عايز حد من الولاد ياخد خبر بالموضوع ده....متجبيش سيره لـ أميره"
"حاضر ......اللى انتا شايفه ....ربنا يخليك لينا وميحرمناش منك
ابدا"
**********************************
نيهال قاعده فى عربيتها قدام البنك مستنيه خروج اميره...نيهال بتشوف اميره بتشاور لها اميره بتروح لها
وبتركب العربيه
"ايه يا حضرت الافوكاتوا ..عملتى ايه فى جلسة النهارده؟"
"دا سؤال....برائه من الجلسه الاولى طبعا"
"يا جامد انت "
بيضحكوا هم الاتنين
"هاااااااا....هنروح فين ؟"
"هنعدى على ماما الاول اجيب الاكل من عندها وبعدين نروّح....انتى كنتى
عايزانى فى ايه"
"ماما جايبالى عريس"
"مبروك....اخير هخلص منك بقى"
"هو انا وفقت؟؟"
"وانتى ايه اللى يخليكى ترفضى ...طنط وفاء مش هتجيبلك عريس وحش"
"هو مش موضوع حلو ووحش....المشكله ان مش ده الانسان اللى بحلم
بيه...دا من الرجاله اللى بتسمع كلام مامتها فى كل حاجه"
"طب ما ده كويس...بعد الجواز هيسمع كلامك...وبعدين انتى مينفعش معاكى
غير واحد زى ده "
"بس بقى بطللى هزار....انتى عارفه انى مش ممكن ارتبط بواحد معندوش
شخصيه وبيسمع كلام حد....ان نفسى فى واحد احبه من اول نظره ويبهرنى بشخصيته....
ورأيه يكون من دماغه"
"علشان كل يوم ترفعى قضيه عليه ان شاء الله"
"تصدقى انا غلطانه انى حكيتلك وانا اللى كنت فاكره انك هتساعدينى انى
اخد القرار الصح"
"يابنتى انت مقرره اصلا...لو عايزه تسمعى رأيى بجد...فكرى كويس
ومتخبيش خيبتى....ادى انتى شايفه الحب عمل فيا ايه ولسه بيعمل..."
"فى حاجه حصلت تانى بينك وبين جاسر.؟؟"
"مفيش جديد ...لسه قافش ومش بيتكلم معايا غير على قد السؤال...انا
خايفه يكون شك فى حاجه..."
"انتى عبيطه...وهو هيعرف منين بس؟"
"مش عارفه....طب هو ليه متغير معايا"
"تلاقى بس عنده مشاكل فى الشغل"
"هو بيقول كده ..بس انا مش مصدقه"بتبص أميره فى الساعه
"ياااه ...الوقت اتأخر...يلا بينا يادوب الحق اخد الاكل من عند ماما
واروّح..قبل جاسر ما يوصل البيت"
بتدور نيهال العربيه وبيمشوا من قدام البنك وهم فى الطريق
"مقولتليش يا أميره...مرات البواب رجعتلك الاسوره والخاتم ولا
لا"
"لا لسه ...بس انا هددتها هى وجوزها لو الحاجات مرجعتش هبلغ
عنهم"
"انتى غلطانه...المفروض كنتى بلغتى عنهم اول ما عرفتى ان الحاجات دى
اتسرقت"
"انا مش عايزه جاسر يعرف بالموضوع ..لانه كان رافض ان اجيب شغاله
واقنعته بالعافيه ان مرات البواب هتيجى تنظف الشقه مرتين فى الاسبوع ...ولو عرف هيعملها حجه ويقولى اقعدى من الشغل
"
"طب وهتعملى ايه دلوقتى"
"انا اديت لهم مهله لحد بكرا..علشان جاسر مسافر شرم وهيرجع يوم السبت
لو الحاجه مرجعتش هبلغ عنهم واللى يحصل يحصل بقى"
نيهال بتوصل اميره لبيت مامتها
"هبقى اكلمك بالليل ..اشوف عملتى ايه فى العريس"
"ماشى ...سلميلى على طنط ناديه وعمو حسين"
"الله يسلمك ...باااى "
"باااى"
بتشمى نيهال بعربيتها وأميره بتطلع لمامتها
********************************
"ما تقعدى شويه يا أميره"
"مش هقدر يا بابا ...عايزه الحق اروّح قبل جاسر ما يوصل البيت"
بتنادى أميره على مامتها
"يلا ياماما كده هتاخر على جاسر"
بتخرج ناديه من المطبع ومعاها كيسه
"خدى يا أميره...الاكل كله جاهز"
بقولك يا ماما " ماتيجى بكره تباتى معايا علشان جاسر مسافر وهبقى
لوحدى"
"ومين اللى هيشوف طلبات ابوكى ووليد"
"مش كنتوا جبتوا شغاله....كانت نفعت دلوقتى"
"انتى عارفه ابوكى مش بيحب ياكل من ايد حد غيرى....ما تيجى انتى تباتى
معانا وتطلعى من هنا على الشغل"
"مش هينفع ...جاسر ممكن يرجع الفجر...مين هيحضر له الفطار...خلاص مش
مشكله لو عرفت اجى هاجى...انا همشى بقى علشان متأخرش. ..سلام ياماما....مع السلامه
يا بابا"
"مع السلامه يابنتى .اجى اوصلك؟"
"لا يا بابا ....استريح انت ...انا هاخد تاكسى"
*************************************
بعد العشا اميره وجاسر قاعدين فى الانتريه بيتفرجوا على التلفزيون
"جاسر يا حبيبى ...عجبك الاكل اللى ماما عملته "
رد جاسر ببرود " كويس"
"انت هتسافر امته؟؟"
"الفجر"
"هقوم احضرلك شنطتك...واحطلك فيها غيار علشان لو هتبات هناك"
جاسر مش بيرد...قامت أميره حضرت الشنطه ورجعت لجاسر تانى
"عايز حاجه ياحبيبى قبل ما أنام ؟؟"
"شكرا"
بتفقد الامل من جاسر وتدخل أوضتها بتمسك التليفون وبتتصل بنيهال
"الو ....ايه يابنتى...عملتى اايه...فى ايه؟!!...فى العريس
طبعا...وطنط وفاء عملت ايه؟....دى اقل حاجه تعملها....انتى حره بس كل دى فرص انتى
بتضيعها من ايدك....بقولك ايه انا بكره لوحدى فى الشقه وجاسر مسافر زى مانتى عارفه
ما تيجى تقعدى معايا.....اوكى...هعملك الاكل اللى بتحبيه...هستناكى
....باااى"
**************************
جرس التليفون بيرن بتيجى أميره من المطبخ "الووو ...ايوه يا ماما
...لا مش هعرف اجى...نيهال هتجيلى تقعد معايا...شكرا ياحبيبتى ....سلميلى على بابا
ووليد"
بتيجى نيهال وبيتغدوا ويتعشوا سوا....وبعد العشاء بيتفرجوا على التليفزيون ...نيهال بتقول ل أميره.....
" يعنى الساعه 10 والبواب ومراته مرجعوش الحاجه."
" يعنى الساعه 10 والبواب ومراته مرجعوش الحاجه."
"هم احرار بقى....انا اديتهم فرصه يرجعوا اللى سرقوه ...لو الحاجات
مرجعتش بكراا الصبح هقدم بلاغ فيهم"
"ايه يابنتى الطيبه دى...انا حاسه انهم صعبانين عليكى "
"انتى بتقولى فيها ....بس مش هم اللى صعبانين عليا ..ولادهم اللى
صعبانين عليا...ايه ذنبهم"
بيرن تليفون نيهال" الووو ...ايوه ياماما....انا عند أميره.....خير
...عايزنى ليه.....حاضر يا ماما ...جايه مش هتأخر....باااى"
"فيه ايه"
"دى ماما يا ستى.....اكيد طبعا قالت لخالى على موضوع العريس وجاى
علشان يتكلم معايا ويقنعنى...."
"يابنتى ماتفكرى تانى....مش ممكن يكون انسان كويس"
"هو فعلا انسان كويس ....بس مفيش نصيب....هقوم انا بقى علشان
متأخرش"
"ماشى ...سلميلى على طنط"
نيهال بتفتح الباب وخارجه.... بتنادى عليها اميره "نيهال....ابقى كلمنى
اما تروحى...اهو تسلينى....انا اول مره ابات لوحدى فى الشقه دى"
"اوووكى...سلام يا ميرا"
"سلام"
قفلت اميره الباب ورا نيهال وبتدخل تقعد قدام التليفزيون وبتقلب فى القنوات
************************************
